சுதந்திரம், ஜனநாயகம், சமத்துவம், மனிதநேயம் ஆகியவற்றைப் பாதுகாப்பதே இந்தியாவின் எதிர்கால முன்னுரிமைகள் – கிருஷ்ணராஜ் வானவராயர் பேச்சு!
குமரகுரு பன்முகக் கலை மற்றும் அறிவியல் கல்லூரி சார்பில், “2050-ஆம் ஆண்டில் காந்தியச் சிந்தனையை மறுவடிவமைத்தல்” என்ற தலைப்பில் கருத்தரங்கம் நடைபெற்றது. இதில் கலந்து கொண்டு பேசிய கல்லூரியின் சேர்மன் கிருஷ்ணராஜ் வானவராயர், இந்தியாவின் எதிர்கால வளர்ச்சிக்கான ஐந்து முக்கிய முன்னுரிமைகளை எடுத்துரைத்தார்.
அவர் பேசுகையில், சுதந்திரம் மற்றும் ஜனநாயகத்தைப் பாதுகாத்தல், அரசியலமைப்பைப் போற்றுதல், நாட்டின் பன்முகத்தன்மையைப் பேணுதல், வளர்ச்சியில் அனைவரையும் உள்ளடக்குதல், அன்பு மற்றும் கருணை போன்ற அடிப்படை மனிதநேயப் பண்புகளைப் பாதுகாத்தல் ஆகியவை இந்தியாவின் எதிர்காலத்திற்கு மிகவும் அவசியமானவை எனக் குறிப்பிட்டார்.
மேலும், இந்தியாவின் சுதந்திரமும் ஜனநாயகமும் நீண்ட போராட்டங்களின் மூலம் பெறப்பட்டவை என்றும், அவற்றை ஒருபோதும் சாதாரணமாகக் கருதக்கூடாது என்றும் தெரிவித்தார். நாட்டின் பன்முகத்தன்மைக்கு மதிப்பளிப்பதுடன், அரசியலமைப்பின் மாண்பைப் பாதுகாப்பதும் எதிர்கால வளர்ச்சிக்கு இன்றியமையாதது என வலியுறுத்தினார்.
காந்தியப் பொருளாதாரக் கொள்கைகள் குறித்துப் பேசிய அவர், நேர்மையான வழிகளில் செல்வத்தை உருவாக்குதல், அதனைச் சமமாகப் பகிர்ந்தளித்தல், இயற்கைக்குப் பாதிப்பில்லாத வளர்ச்சியை உறுதிப்படுத்துதல் ஆகியவையே அதன் அடிப்படை அம்சங்கள் என்றார்.
பொருளாதார வளர்ச்சி என்பது வருமானப் பெருக்கத்தை மட்டுமே அடிப்படையாகக் கொண்டிருக்கக் கூடாது. மனித நலன், சுற்றுச்சூழல் நிலைத்தன்மை, நீடித்த அமைதி மற்றும் மகிழ்ச்சி ஆகியவற்றுக்கும் முக்கியத்துவம் அளிக்கப்பட வேண்டும் எனத் தெரிவித்தார்.
மேலும், “தகுதியானவர்கள் மட்டுமே வாழ முடியும்” என்ற அணுகுமுறைக்கு மாற்றாக, அனைவரும் முன்னேறுவதற்கான சமமான வாய்ப்புகளை உருவாக்குவதே காந்தியச் சிந்தனையின் நோக்கம் எனக் குறிப்பிட்டார். பொருளாதார வளர்ச்சியை மதிப்பிடும்போது வருமானத்தை மட்டுமே அளவுகோலாகக் கொள்ளாமல், சமத்துவம் மற்றும் சமூகப் பொறுப்புணர்வுக்கும் முக்கியத்துவம் அளிக்க வேண்டும் எனப் பொருளாதார வல்லுநர்கள் மற்றும் கொள்கை வகுப்பாளர்களைக் கேட்டுக்கொண்டார்.
